Isa 51 | NdeIBE | STEP | “Lalelani kimi lina elilandela ukulunga lidinga loJehova: Khangelani edwaleni elacezulwa kulo lasegodini lamatshe elambiwa kulo;

Isaiah 51

Insindiso Engapheliyo YeZiyoni

1 “Lalelani kimi lina elilandela ukulunga lidinga loJehova: Khangelani edwaleni elacezulwa kulo lasegodini lamatshe elambiwa kulo;

2 khangelani ku-Abhrahama, uyihlo, lakuSara owalizalayo. Ekumbizeni kwami wayemunye, ngambusisa ngamandisa.

3 Ngeqiniso uJehova uzaduduza iZiyoni abe lesihawu kuwo wonke amanxiwa alo; uzakwenza izinkangala zalo zibe njenge-Edeni, amazwe alo alugwadule afane lesivande sikaJehova. Ukuthaba lentokozo kuzafunyanwa kulo, kanye lokubonga lelizwi lokuhlabela.

4 “Lalelani kimi, bantu bami; ungizwe lawe sizwe sami: Kuzaphuma umthetho uvela kimi; ukulunga kwami kuzakuba yikukhanya ezizweni.

5 Ukulunga kwami kusondela ngokuphangisa, insindiso yami iyeza, ingalo yami izaletha ukulunga ezizweni. Izihlenge zizakhangela kimi, zilinde zithembe amandla ami.

6 Phakamiselani amehlo enu phezulu emazulwini likhangele lasemhlabeni phansi; amazulu azanyamalala njengentuthu; umhlaba uzaguga njengesigqoko. Abakhe kuwo bafe njengempukane. Kodwa insindiso yami izakuba khona kuze kube nininini, Ukulunga kwami akuyikuphela.

7 “Ngizwani lina elikwaziyo okulungileyo lina bantu abagcina umthetho wami ezinhliziyweni zenu: Lingakwesabi ukugconwa ngabantu, kumbe lethuswe yizithuko zabo.

8 Ngoba inondo izabadla njengesigqoko; impethu ibadle njengewulu. Kodwa ukulunga kwami kuzakuba khona kuze kube nininini; Lensindiso yami ikhona kuzizukulwane zonke.”

9 Vuka, vuka! zigqokise amandla akho, wena ngalo kaJehova; Vuka njengasezinsukwini zendulo, lanjengakuzizukulwane zakudala. Kawusuwe yini owaquma uRahabi waba yiziqa, wagwaza lesilo lesiyana na?

10 Kawusuwe yini owomisa ulwandle, amanzi atshona kakhulu, wenza umgwaqo ezinzikini zolwandle ukuze abahlengiweyo bachaphe na?

11 Abahlengiweyo bakaJehova bazabuya. Bazangena eZiyoni behlabela; ukuthokoza okungapheliyo kuzakuba ngumqhele emakhanda abo. Ukuthaba lokujabula kuzabehlela; usizi lokububula kuzaphela.

12 “Mina, mina uqobo, nginguye oliduduzayo. Ungubani wena ukuba wesabe abantu abafayo, amadodana abantu, abutshani nje,

13 uze ukhohlwe uJehova, uMenzi wakho, owendlala amazulu wabeka lezisekelo zomhlaba, ukuthi uhlale ngokwesaba okungapheliyo nsuku zonke ngenxa yolaka lomcindezeli, ohlose ukuchitha na? Ngoba lungaphi na ulaka lomcindezeli?

14 Izibotshwa ezitshotshobeleyo zizakhululwa masinyazana, aziyikufela emajele azo, kumbe ziswele ukudla.

15 Ngoba mina nginguJehova uNkulunkulu wakho ophehla ulwandle ukuze amagagasi alo ahlokome – ibizo lakhe nguJehova uSomandla.

16 Ngifake amazwi ami emlonyeni wakho ngakwembesa ngomthunzi wesandla sami – mina engabeka amazulu endaweni yawo, ngabeka izisekelo zomhlaba, njalo othi kuZiyoni, ‘Lina lingabantu bami.’

Inkezo Yolaka LukaJehova

17 Vuka, vuka! Phakama wena Jerusalema, wena onathe esandleni sikaJehova inkezo yolaka lwakhe, wena oyikhoce wafika enzeceni zayo; inkezo eyenza amadoda adiyazele.

18 Kuwo wonke amadodana eliwazeleyo, kayikho eyayingalikhokhela; kuwo wonke amadodana elawondlayo, kayikho eyayingalibamba ngesandla.

19 Lezizingozi ezimbili zikwehlele; ngubani ongakududuza na? Incithakalo lokubhujiswa, indlala lenkemba – ngubani ongakududuza na?

20 Amadodana akho aphele amandla, ayalala ezihlokweni zemigwaqo yonke njengenyamazana ebanjwe ngumbule. agcwele ulaka lukaJehova lokukhuza kukaNkulunkulu wakho.

21 Ngakho-ke zwana lokhu wena ohluphekayo lodakisiweyo, kodwa kungasingewayini.

22 Nanku okutshiwo nguJehova Wobukhosi bakho, uNkulunkulu wakho ovikela abantu bakhe: “Khangela, sengiyisusile esandleni sakho inkezo ekwenza udiyazele; leyonkezo engeyolaka lwami, awuyikunatha ngayo futhi.

23 Ngizayibeka ezandleni zabakuhluphayo, abathi kuwe, ‘Cambalala ukuze sihambe phezu kwakho.’ Wena-ke wenza umhlane wakho waba njengenhlabathi, lanjengomgwaqo okungahanjwa kuwo.